Aqyar sakini Telegramda yazğan izaatında Rusiye ordusını itibardan tüşürgeni içün para cezasını alğan. Bu aqta şeerniñ Rusiye polisi bildirdi.
Bildirilgenine köre, naqliyat müessisesiniñ hadimi ukrayin ordusınıñ areketlerini "müsbet ve alğışlav" ile izaatlağan.
Oña qarşı memuriy protokol tizilgen ve 45 biñ ruble para cezası berilgen, dep qoştılar poliste.
"KrımSOS" aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.
Aq qorçalayıcılar, Rusiye quvetçileri tarafından açılğan devlet hainligi, işbirlik ve casuslıq aqqında davalarnıñ sayısı bir qaç qat artacaq, dep tahmin ete. Şimdi FSB bu kibi davalarnı aman-aman er kün aça, 2014 senesine qadar ise yılda 10 dava açılğan edi. Ukrayinağa qarşı keñ kölemli basuvdan soñ devletke iftira aqqında maqale Rusiye Federatsiyasında cenkke qarşı çıqqanlar içün eñ populâr maqalelerden biri oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
