Ukrayina Moskvanıñ Kyivge qarşı alıp barğan cenkini bitirmek maqsadınen barışıq yolunı tapmaq içün uzun müddetli ateşkesni talap etmege devam ete, dep bildirdi mayısnıñ 7-nde aqşam video muracaatında Ukrayina prezidenti Volodımır Zelenskıy.
«Darbeleri, ateşni eñ az 30 künge toqtatmaq teklifimiz qala – biz diplomatiyağa imkâ bere bilgen bu teklifni keri almaymız. Amma dünya Rusiyeden bir cevap körmey – yañı ücümlerden ğayrı iç bir cevap yoq. Bu er keske cenk qaydan kelgenini tam köstere. Rusiye istilâsını toqtatmalı, ve bunı yapmağa mecburlar. Bu tek vaqıt meselesidir», – dep qayd etti Zelenskıy ve «dünya adaleti de çalışacaq – çoq şeyde, ne yazıq ki, yavaş-yavaş, amma, müim olğanı qaçından-qaçmaycaq», dep qoştı.
Ukrayina prezidenti bildirgenine köre, Ukrayina Silâlı quvetleriniñ Baş komandanı Oleksandr Sırskıynıñ maruzası «Kursk ve Belgorod vilâyetlerinde faal areketlerimizge» bağışlandı.
«Biz Ukrayina toprağını sıñırda duşmanlıq faaliyetinden qoruymız. Men bugün er bir bölükke, bütün askerlerimizge, bütün serjantlarımızğa ve komandanlarımızğa teşekkür bildirmege isteyim. Epiñizge metanet ve Ukrayinağa pek kerek olğan aqiqiy quvet içün teşekkür bildirem», – dep qayd etti devlet yolbaşçısı.
Kreml aprelniñ 28-nde Rusiye prezidenti Vladimir Putin mayısnıñ 8, 9 ve 10-nda «Zaferniñ 80 yılı» munasebetinen barışıqnı ilân etti, dep bildirdi.
Ukrayina prezidenti Volodımır Zelenskıy, Rusiye Federatsiyasınıñ bu teklifini izaatlap, Ukrayina ABDniñ ateşkes ve 30 künlik pauza ğayesine qoltutqanını hatırlattı ve Putinniñ beyanatını «manipulâtsiyağa daa bir areket» dep adlandırdı: «Mayısnıñ 8-ni beklemek içün bir sebep yoq. Ve ateş soñra kene öldürmek içün bir qaç künge toqtatılmamalı. Aateş acele, bütünley ve şartsız bir şekilde ve eñ az 30 künge toqtatılmalı, kefalet olmalı – bu kerçek diplomatiyanıñ temeli ola bile».
Rusiye mayıs ayında bir qaç künge ateşkes ilân etken soñ, Beyaz Saray ABD prezidenti Donald Trump daima ateşkes olmasını körmege istey, dep bildirdi. Bu aqta aprelniñ 28-nde keçirilgen brifingde Beyaz Saraynıñ matbuat kâtibi Kerolayn Levitt bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
