52 genç qırımlı Qırımnıñ Rusiye akimiyeti tarafından repressiyalarğa oğratıldı, 32 insan tamır qırımtatar halqından ola. Bir qısmı SİZOda buluna, digerleri Rusiye koloniyalarında cezasını çeke, dep bildirdi Qırımtatar resurs merkeziniñ reisi Eskender Bariyev.
Qırımtatar resurs merkeziniñ malümatına köre, 2025 senesi mayıs ayına qadar 52 genç qırımlınıñ siyasiy sebeplerden taqip etilgeni qayd etildi, 14-ü tahqiqat izolâtorlarında, daa 38-i Rusiye koloniyalarında buluna.
Qurbanlar arasında – «terrorizm», «devlet hainligi», «Hizb ut-Tahrirde iştirak etüv» ya da «arbiy komissarlıqlarnı ateşke berüvde» qabaatlanğan em qırımtatarlar, em ukrayinler.
«Yıl-yıldan yarımadada cinaiy davalar boyunca taqip etilgen yaşlarnıñ sayısı bayağı arta. Faal vatandaşlıq pozitsiyası içün yaşlar deşetli repressiyalarğa oğray ya da apiske oğramamaq içün yarımadanı terk etip, dünyanıñ çeşit memleketlerine ketmege mecbur olalar», – dep qayd etti Bariyev.
Tutulğanlardan bazıları bir qaç ayğa ğayıp ola edi. Digerleri 12,15 ve atta 17 yıl sert rejimli koloniyalarda qalmasına üküm etildi. İçtimaiy ağlarda paylaşqanları içün taqip etilgenler de bar.
Bir kün evelsi Qırımda Rusiye uquq qoruyıcılarınıñ mayısnıñ 6-ndan berli haber alınamağan 24 yaşında Hatice Büyükçannı tutqanları belli oldı. Al-azırda tutuv sebepleri belli degil. Bulunğan yeri aqqında resmiy tafsilâtlar yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
