Qırımda Rusiye uquq qoruyıcıları mayısnıñ 6-ndan berli haber alınamağan 24 yaşında qırımlı Hatice Büyükçannı tuttı. Bu aqta Qırımtatar resurs merkezi (QRM) Naciye Feminiñ Telegram kanalına esaslanıp haber ete.
Haberge köre, mayısnıñ 6-nda saba Hatice Eski Qırımdan Aqmescitke ketmek içün avtobusqa mindi, soñra ise ğayıp oldı. Cep telefonı qapalı edi, tuvğanları bulunğan yerini bilmey edi.
Mayısnıñ 7-nde belli olğanına köre, genç qız Rusiye uquq qoruyıcıları tarafından tutuldı. Al-azırda tutuv sebepleri belli degil. Bulunğan yeri aqqında resmiy tafsilâtlar yoq.
Qırımtatar resurs merkezi qayd etkenine köre, bu Qırım yaşlarını qorquzmaq içün yapılğan daa bir qanunsız tutuv örnegi ola.
«İşğalci akimiyet faal gençlerni, hususan qadınlarnı daa sıq taqip ete», – dep aytıla haberde.
Мayısnıñ 6-nda Qırım aq qorçalayıcı gruppasınıñ (QAQG) idare reisi Olga Skripnik «Vatandaş cemiyeti Rusiye esirliginde» adlı tedbirde çıkışta bulunıp, Qırımda soñki yıl devamında Rusiye uquq qoruyıcıları yarımadanıñ Rusiye işğaline qarşı aktsiyalarda iştirak etken qadınlarnıñ taqip etilüvini quvetleştirdi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
Ukrayina prezidentiniñ Qırım Muhtar Cumhuriyetindeki temsilciligi Roskomnadzor Rusiye işğal etken Ukrayina topraqlarında, hususan Qırımda informatsion ceetten kontrolni quvetleştire, dep bildirdi.
Haberge köre, Rusiye müessisesiniñ qararına köre, internet provayderleri internetke bağlanğan bütün cihazlarnıñ IP adresleri, geolokatsion malümat, ağğa irişüv içün qullanılğan bütün cihazlarnıñ identifikatorları, qullanılğan programma teminatı ve internet trafiki aqqında malümatnı toplap Roskomnadzorğa bermeli.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
