Kyivde mayısnıñ 8-nde Qırımtatar halqı sürgünliginiñ qurbanları hatıra kününe bağışlanğan «Accı badem açqan yerde…» medeniy-bediiy sergisi açıldı, dep haber ete «Suspilne Krım».
Sergide qoqla kompozitsiyaları, bediiy eserler, arhiv kitapları ve qırımtatar medeniyetinen ve sürgünlik vaqialarınen bağlı teatral spektakl birleştirile.
«Ğaye 2022 senesi noyabr ayında peyda oldı. Qoqla ustalarınen bayram, urba, ananelerni tedqiq etip, bütün dünyadan 40 ustaznen 63 eser yaptıq. Er bir qoqla – bir ikâye, menba, müzey hatırası. Spektakl de olacaq – unikal bir şey. Şimdi Kyivde cenk körgen balalar qorqunç sürgünlik adiseleri aqqında tarif ete», – dep ikâye etti sergi teşkilâtçısı, «Ukrayinanıñ merasim medeniyeti» cemaat teşkilâtınıñ reisi Valeriya Levkovskaya.
Sergini Qırımtatar Milliy Meclis reisiniñ birinci muavini Nariman Celâl ve qırımlı rejissör, Ukrayina Silâlı quvetleriniñ arbiyi Ahtem Seitablayev.
«Ukrayinalılar bu acını yahşı añlay – özleri de pek qorqunç şeyler kördi – açlıq, ziyalılarnıñ qurşunğa tizilüvi ve daa çoq şey. Ve şimdi epimiz azatlıq, mustaqillik ve devletimizniñ bütünligi oğrunda beraber küreşemiz. Bunı unutmamaq Kerek», – dedi Celâl sergide.
«Rusiye imperiyasınıñ bizni yoq etmek istegine baqmadan – biz barmız. Sovetler Birligi bizni yoq etmege istese de, biz barmız. Ölüm istegenler yoq olacaq. Bizler ise, sevgen ve yapqanlar, yaşamağa devam etecekmiz. Bu sergi bunıñ delilidir», – dep qoştı Seitablayev.
Bıltır oktâbrniñ 9-nda Ukrayina Yuqarı Radası çetel devletleriniñ ükümetleri ve parlamentlerini qırımtatarlarnıñ 1944 senesi Qırımdan sürgün etilüvini qırımtatar halqınıñ genotsidi olaraq tanımağa çağırdı.
Dekabrniñ 18-nde Çehiya Senatı 1944 senesi qırımtatar sürgünligini genotsid olaraq tanıdı. Qayd etilgen 74 senatordan 70-i bu qararğa rey berdi.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Qırımtatar halqınıñ lideri Mustafa Cemilev Azatlıq Radiosına bergen intervyüsında Çehiya akimiyeti başqa memleketlerni 1944 senesi qırımtatar halqınıñ sürgünligini genotsid olaraq tanımağa iqna etmek içün öz tesirini qullanmağa söz berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
