"Sarı şerit" areketi quralaynıñ 9-nda Aqmescitniñ yerastı keçitlerinden birinde yapılğan "Gitlerni yeñdik, Putlerni de yeñermiz" graffiti fotoresimini derc etti.
"İşğal ne qadar devam etse de, faallerimiz özüni unuttırmaylar. Küreş bir kün bile toqtamay. Bir vaqıtları beş yıl devam etken uzun ve qorqunçlı cenkte biz Gitlerni yeñdik, bundan soñ Putinniñ Rusiyesini de yeñermiz", — dep yazdı faaller.
Faaller graffiti ne vaqıt yapılğanını ve saqlanıp-saqlanılmağanını aytmaylar.
Bundan ğayrı, areket faalleri quralaynıñ 9-nda Qırımda ve Rusiye tarafından işğal etilgen diger ukrayin topraqlarında portaqal-qara şeritler, Rusiye bayraqları ve Rusiye gazetleriniñ yaqılğanınıñ fotoresimlerini derc eteler.
"Sarı şerit" teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve "Qırım Ukrayinadır" sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
