İşğal etilgen Qırımda «Sarı şerit» Natsizmni yeñüv ve hatıra kününe bağışlanğan aktsiya keçirdi. Bu aqta areketniñ Telegram kanalında haber etile.
Qayd etilgenine köre, faaller Aqmescit, Aqyar, Lugansk ve Donetskte risaleler tarqattı.
«O deşetli vaqialarğa oğrağan qartbabalarımızğa ürmet ve sevgiden vaqtınca işğal etilgen topraqlarda timsaliy qırmızı haşhaşlar tarqattıq», – dep qayd etti areket.
Cenkleşken Ukrayina ve Rusiye Ekinci cian cenki ve hatıra meselesinde aynı fikirde degiller. Er yıl mayısnıñ başında Rusiyede muhalifet «ğalebe deliligi» dep adlandırğan şey olsa, Ukrayinada Ekinci cian cenkiniñ qurbanları añıla ve XX asırnıñ ortasında insanlıq körgen facianıñ tekrarlanmamasını isteyler.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve «Qırım – Ukrayinadır» sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
