Ukrayina prezidenti Volodımır Zelenskıy quralaynıñ 8-nde ABD prezidenti Donald Trampnen telefon vastasınen laf etkenini bildirdi.
Onıñ aytqanına köre, taraflar Avropada natsizm üzerindeki ğalebe kününen hayırlavlarnen almaşqanlar. Olar Yuqarı Rada tarafından «işbirlik içün çoq yañı imkânlar açqan aqiqaten tarihiy vesiqa» olğan İqtisadiy ortaqlıq añlaşması tasdıqlanğanını alğışlağanlar.
"Biz tınçlıq içün ilerideki areketlerniñ kerekligini, hususan, yapıla bilecek konkret adımlarnı muzakere ettik. Prezident Tramp cenk meydanındaki vaziyet aqqında soraştırdı, men ise oña qısqadan malümat berdim. Aynı vaqıtta Ukrayina 30 künlük ateş toqtatıluvına azır olğanını, atta bugünden başlap olğanını haber ettim. Biz Rusiyeniñ bu teklifke razı olacağını bekleymiz", — dedi o.
Zelenskıynıñ aytqanına köre, subette o, Ukrayina er bir formatta muzakerelerge azır olğanını tasdıqladı, amma bunıñ içün Rusiye cenkni bitirmek niyetleriniñ ciddiyligini köstermek kerek, bütünley ve şartsız ateşni toqtatuvdan başlamaq kerek.
"Prezident Tramp bu cenkniñ bitkenini istegenini, yardım etmege azır olğanını ve ateş toqtatuvınıñ kerekligini desteklemege azır olğanını kene tasdıqladı. Biz ilerideki adımlar aqqında keliştik", — dep öz fikrini yekünledi devlet başı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
